秋冬必睇日系網購懶人包

廿六度,個個開始著薄外套、長袖衫~終於講:「最近天氣開始轉涼了!」講到轉季,你哋又準備好買轉季衫同藥妝未呢?轉涼總會出現皮膚乾燥嘅症狀,每次沖完涼就想用返啲護膚品做個全身滋潤,其實日本就有唔少藥妝網店,唔駛飛去日本都買到~仲可以順便一次過睇埋其他日牌 online store,買齊轉季衫褲無難度!仲可以買埋俾小朋友添。


藥妝產品

Kenko

Kenko 係日本最大嘅網上藥妝店之一,成立超過 20 年,而喺 2012 年更被日本樂天收購,成為第一間被日本官方認可喺網上出售藥妝嘅的網站。出售產品類別都非常齊全,例如護膚品、化妝品、母嬰產品、保健品或日用品都可以喺 Kenko 買到,連同寵物用品都買到。絕對係松本清嘅另一選擇,真係唔駛飛去日本都可以買齊晒啲藥妝喇。

Plaza

Plaza 呢間美妝雜貨店賣嘅都係日本最新最熱門嘅化妝品,同時亦有好多可愛雜貨出售,入去行一轉真係滿足哂幾個願望架~Plaza 同樣設有網店,坐喺屋企就可以買到日本最新美妝品,夠哂方便!ettusais、deJavu、Sana 等品牌都可以喺呢度搵到!

It’s Demo

日本 It’s Demo 呢個美妝雜貨店係唔少女生去日本時一定要去嘅舖頭,佢哋周不時都會同唔同卡通做 Crossover,好似而家就有同 Pokemon 做聯乘,真係每樣嘢都好得意架!除咗美妝品之外仲有服裝、生活雜貨等產品出售,唔洗飛去日本都一樣買得到,夠哂方便啦~

松本清

去藥妝店掃貨已經變成去日本旅行嘅指定動作,啲嘢平過香港咁多無理由唔買架嘛!不過小編近幾次入到藥妝店都覺得行得唔多舒服,人多貨又多,真係想慢慢揀清楚邊樣嘢真係啱用都唔得,最重要係俾錢條人龍任何時候都咁長,見到都覺得攰呀!其實想買藥妝真係好簡單,上網一樣可以掃貨!非常出名嘅藥妝店松本清其實都設有網店,大家坐定定喺屋企慢慢揀,完全唔洗俾人撞嚟撞去,又要搵店員問吓件貨放喺邊咁,舒舒服服就買到啦~

潮流服飾

Stripe Club

Stripe Club 有多個熱門日本女裝品牌,包括 Earth Music & Ecology、E hyphen world gallery、Green Parks、Koe 等等,各品牌最新秋冬服飾都可以喺呢度搵到!

Dot-St

如果平時睇開 Lowrys Farm、Global Work、Heather 等日牌的話,咁就要上去 Dot-St 睇睇喇,佢有齊哂呢幾個牌子之餘仲成日都做折扣,絕對比香港專門店抵買!轉季又點可以唔上去睇睇呢~

Zozotown

各大日牌集中地嘅 Zozotown,有成 50 幾萬件商品,真係揀都揀到手軟呀!品牌包括 BEAUTY & YOUTH、UNITED ARROWS、JOURNAL STANDARD 等日牌,喺香港 Mark Up 高好多架真係!

Belle Maison

日本著名優質日貨網店,專賣潮流時裝同家居雜貨等等而且價格親民。最重要嘅係佢亦係迪士尼嘅官方授權網店,一啲連迪士尼官網都無嘅產品都可以喺到搵到㗎!

母嬰產品

西松屋

去日本除咗可以瘋狂買衫俾自己之外,仲可以買埋俾屋企個小朋友架~網購都唔例外!好多人都好鍾意嘅西松屋而家做緊期間限定 Sale,好多小朋友用品以及服裝都有減價啊!

Babydoll

有去過日本嘅朋友,應該都有見過 Babydoll 呢個童裝品牌。佢地有同迪士尼合作,推出唔少 Disney 童裝服飾,迪士尼角色任你做,男童女裝都有架!公主得嚟又唔太誇張,米奇得黎又夠晒可愛,媽咪們點可以忍得到手呢?價錢都係由一千円起咋!

寵物用品

iDog & iCat

唔少奴才都鍾意為家中主子扮靚,間唔中轉下新 look 又可以影相呃下 like,有和服 look、萬聖節 look、仲有各款得意床仔。來自日本嘅口碑品牌 iDog & iCat,設計出最安全舒適、最別出心裁嘅用品,俾家中嘅主子安心使用。

Pet Paradise

好多奴才去到日本都會去行吓 Pet Paradise,因為呢間寵物用品店啲款真係夠哂得意,仲經常推出唔同卡通人物嘅產品,好似 Disney、Snoopy、Gaspard et Lisa 等等,著喺主子身上就更加可愛啦~

DOG CHOiCE

想幫家中主子扮靚靚?呢個網真係可以令奴才們大出血!事關 DOG CHOiCE 出售好多狗狗服裝、用品同飾物,有成過千個款式,真係花多眼亂有排買,最重要嘅價錢由幾百円起跳!