賀年及情人節禮物特集

踏入咗 2018 年都差唔多三個禮拜,係時候為二月份嘅兩大節日做好準備喇~先係有西方嘅代表 2 月 14 日情人節,緊隨其後就係中國嘅農曆新年,今年嘅年初一為 2 月 16 日。呢兩個節日少不免都要送下禮物,無論係送俾情人定親戚朋友,都要揀件夠得禮嘅!咁樣的話開支都唔少,不如上網睇下點樣網購先可以買得夠精明。以下為大家挑選唔同類型嘅產品,而家買定到時就可以送禮啦~

情人節

Timex

情人節總會想買返啲情侶裝同情人一齊用,手錶每日都要戴住,用嚟做情侶用品就最啱啦~Timex 呢個手錶牌子係美國出哂名,出名夠平兼且品質唔錯,仲非常多款式可以揀,大部分款都有齊男女裝,同另一半一人一隻夠哂 Sweet!

MLTD

如果你同另一半都鍾意潮牌的話,可以喺呢個歐洲潮牌集中地 MLTD 睇睇,Stussy、Huf、Alpha Industries、Cheap Monday、Visual、Adidas、Nike 等牌子都可以喺呢度搵度,揀返幾樣產品就可以同另一半著情侶裝啦~

Michael Kors

女士們熱愛嘅 Michael Kors,喺外國網站買絕對比喺香港門市買要平,手袋最平都只係約 HK$403 就買到,門市買點都要成千蚊一個!所以話要買得夠醒一定係上網買,咁就唔驚女朋友詐型啦~除咗女裝之外,其實 Michael Kors 都一樣有推出男裝,揀返個銀包或者公事包俾男朋友一樣得。

Ted Baker

Ted Baker 呢個英國品牌一直都深受各界女生歡迎,佢哋嘅款式無論係去街用或者上班一族返工用都非常適合。除咗袋款,長銀包亦係唔少女生嘅心頭好,Ted Baker 嘅款式夠哂大方得體,絕對係送俾女朋友嘅好選擇。

Nordstrom

要送禮物俾女朋友都唔洗愁嘅,女仔最鍾意嘅唔係手袋就係化妝品~喺 Nordstrom 就有好多唔同品牌嘅化妝品或護膚品套裝出售,例如 MAC、Bobbi Brown、Clinique、Kiehl’s等,而且價錢比起喺香港門市買平好多,咁樣荷包先無咁傷架嘛~

Amazon

男仔通常都鍾意啲比較實用嘅禮物,送返個銀包俾佢就啱哂啦~日日都帶係身,夠哂實用!Amazon 就有多款男士銀包俾你揀,Tommy Hilfiger、Levi’s 等牌子都可以喺呢度搵到,總有一款啱佢用!

M&M’s

喺情人節呢個重大節日當然唔係送普通 M&M’s 咁簡單啦~美國嘅 M&M’s 提供客製化服務,可以俾你設計專屬嘅 M&M’s!除咗可以揀顏色之外,仲可以揀想要嘅圖案、字體、相片,包裝上亦有多款選擇,豐儉由人。

Sugarfina

美國嘅 Sugarfina 就係專門為成年人而設嘅糖果,佢哋最出名嘅口味就係 Champagne Bears,充滿口感嘅熊仔糖配上香檳獨有嘅味道,食落並無一般熊仔糖咁甜。另外仲有啤酒、粉紅玫瑰酒等多款選擇,絕對適合成年人嘅口味。佢哋嘅包裝真係非常靚!仲有好多 set 裝俾你選擇,價錢亦唔算太貴,一套三盒嘅禮盒裝都只係二百幾蚊,用嚟當做情人節禮物或者新年送禮真係啱哂!

日本 Sanrio

日本 Sanrio 同 Godiva 今年推出嘅特別版分別有 Hello Kitty 同 Melody 兩款,成隻公仔都以粉紅色為主,絕對配合情人節嘅主題!除咗有公仔之外,仲有公仔吊飾同埋儲物盒,無論係實用派定係可愛派都可以滿足到!所有套裝都包括 5 粒 Godiva Truffles朱古力,售價為 3,240-5,400円(約 HK$226-376)。

日本 Disney

女仔對於得意嘢真係無咩抗拒能力,Disney 每個角色都咁可愛,送俾女朋友就啱哂啦~佢哋喺 1 月 26 日仲會推出情人節特別版嘅 Disney ufufy,望住咁可愛嘅佢哋特別 Sweet!

日本樂天 — Star War 朱古力套裝

情人節想送朱古力俾男朋友,但又無時間自己親手整,又覺得出面買到嘅款式唔夠特別?都可以考慮吓喺日本樂天選購呢款 Star War 朱古力套裝,有齊黑武士同白兵造型嘅朱古力,男仔就啱哂啦~一盒有 15 粒,售價為 1,296円(約 HK$91)。

農曆新年

Godiva

Godiva 呢個牌子喺香港好多商場都有門市,有時行過見到個價錢真係嚇一嚇,一盒朱古力竟然可以咁貴!但佢哋嘅出品又的確係好食啲,一分錢真係一分貨~其實想食 Godiva 嘅朱古力,除咗可以喺香港門市買之外,一樣可以網購!佢哋美國網站上嘅貨品都係禮盒裝為主,新年用嚟送禮就啱哂喇!

Blue Diamond 杏仁禮盒

傳統上都要買返啲賀年禮品送俾親戚朋友,除咗送朱古力同曲奇之外,都可以考慮一下送杏仁禮盒。喺美國 Amazon 就有 Blue Diamond 杏仁禮盒,一盒四罐裝有齊原味、蜜糖味、鹽味、煙焗四款口味,每罐有 6 oz 即約 170g,售價只係 US$22.49(約 HK$176)!想要再大盒啲得體啲嘅可以揀六罐裝,售價為 US$31.99(約 HK$250)。

英國 Whittard

講起英國必買嘅手信,好多人都會推薦 Whittard 呢個英國著名嘅經典茶葉品牌。英國人對飲茶非常講究,即使係紅茶都有必好多種,更加有好多唔同嘅口味。佢哋推出咗好多唔同組合嘅套裝,有啲仲有埋曲奇,包裝又靚,用嚟送禮都夠哂得體。

日本樂天

新年送禮唔想再買金莎同藍罐曲奇的話,不防考慮一下去日本樂天揀吓啲禮盒裝~六花亭、白之戀人、十勝 toteppo 工房等都可以喺呢度搵到,價錢比起香港仲更加抵買!送俾親戚朋友或者客戶都可以喺呢度入貨!

Samsonite 行李箱

去旅行除咗旅伴好重要之外,有個好嘅行李箱都同樣重要!如果係去程就已經俾人整爛咗個喼,真係咩心情都無哂啦~所以買返個夠實淨、耐用嘅行李箱真係好重要!想趁過年去返個旅行?梗係買返個新「喼~~~神」傍下身啦!